Forsíða - Rangárþing Ytra

á vefnum

í fréttum/fundargerðum

Menning og Mannlíf

20.9.2011 14:37

Malarastúlkan fagra í Selinu á Stokkalæk

Laugardaginn 24. september kl. 16 munu þeir Benedikt Kristjánsson tenór og Bjarni Frímann Bjarnason píanóleikari flytja Malarastúlkuna fögru, Die schöne Müllerin, í Selinu á Stokkalæk. Ljóðaflokkurinn Malarastúlkan fagra, sem Franz Schubert (1797-1828) samdi ógleymanlega tónlist við, er eftir þýska ljóðskáldið Wilhelm Müller (1794-1827). Þessi flokkur er meðal fegurstu verka rómantíska tímabilsins í ljóðatónlist og ásamt Vetrarferðinni sá vinsælasti úr smiðju Schuberts. Veitingar verða fram reiddar á þessum áhugaverðu tónleikum í friðsæld og fegurð Rangárvalla. Miðaverð er kr. 2.000 og miðapantanir í síma 4875512 og 8645870.

Benedikt Kristjánsson er fæddur á Húsavík 1987. Með grunnskólanámi lærði hann á píanó og gítar og söng í rokkhljómsveit. Hann hóf söngnám 16 ára gamall við Söngskólann í Reykjavík hjá Sibylle Köll og síðan móður sinni, Margréti Bóasdóttur. Benedikt lauk framhaldsprófi í söng frá Tónlistarskólanum í Reykjavík vorið 2007 undir handleiðslu þeirra Margrétar Bóasdóttur og Krystinu Cortes. Hann stundar nú söngnám við Hanns Eisler tónlistarháskólann í Berlín þar sem kennari hans er tenórinn Scot Weir. Benedikt hefur sungið einsöngshlutverk í messum og kantötum eftir Bach í Berlín, guðspjallamanninn í Jóhannesarpassíu Heinrich Schütz í Heidelberg, tenórhlutverk í As-dúr messu Schuberts á kórastefnu við Mývatn 2009, tenórhlutverk í Der Rose Pilgerfahrt eftir Schumann í Berlín og Heidelberg, ljóðaflokkinn Dichterliebe eftir Schumann á Stokkalæk í september 2010, guðspjallamanninn í Jóhannesarpassíu Bachs í Hallgrímskirkju og á Hofi á Akureyri á liðnu vori, þá aríur í Mattheusarpassíunni í Heidelberg og H-moll messunni í Berlín. Benedikt hlaut fyrir skömmu 1. verðlaun í „Internationaler Greifswalder Bach-Gesang Wettbewerb” keppninni. Í desember næstkomandi mun hann syngja guðspjallamanninn og aríur í Jólaóratoríu Bachs í Berlín.

Bjarni Frímann Bjarnason er fæddur í Reykjavík 1989. Hann hóf ungur fiðlunám, fyrst hjá Lilju Hjaltadóttur fiðluleikara og síðar Guðnýju Guðmundsdóttur konsertmeistara. Hann brautskráðist frá Listaháskóla Íslands vorið 2009 undir handarjaðri Guðnýjar með einleikarapróf á lágfiðlu. Bjarni stundaði píanónám við Tónlistarskólann í Reykjavík og síðar Listaháskóla Íslands hjá Halldóri Haraldssyni píanóleikara. Bjarni leggur nú stund á hljómsveitarstjórn við Hanns Eisler tónlistarháskólann í Berlín undir handleiðslu Christian Ehwald prófessors. Bjarni er stjórnandi strengjasveitarinnar Skark sem stofnuð var árið 2008 af ungu íslensku tónlistarfólki sem flest stundar nám erlendis. Tónleikar sveitarinnar á Íslandi árið 2009 voru valdir bestu tónleikar ársins af gagnrýnanda Morgunblaðsins.

Til baka