Sunnudaginn 3. júlí næstkomandi kl. 16 verða haldnir nýstárlegir tónleikar í Selinu á Stokkalæk. Þar koma fram þær Rannveig Káradóttir sópransöngkona og Birna Hallgrímsdóttir píanóleikari og flytja íslenska tónlist við samspil ljósmynda franska ljósmyndarans og sushi-kokksins Michaël Pankar. Yfirskrift tónleikanna er „Íslensk náttúra” en hún hefur svo sannarlega verið í sviðsljósinu hér heima og erlendis undanfarna mánuði. Í henni er fólgið sterkt afl sem er þess ekki einungis megnugt að stöðva flugumferð í heiminum heldur hefur hún um aldabil veitt ljóð- og tónskáldum innblástur og getið af sér óumræðanlega fagrar perlur.

Efnisskráin er þannig uppbyggð að hvert lag er tileinkað ákveðnum hlutum eða fyrirbærum sem finnast í eða tengjast íslenskri náttúru svo sem hrauni, hverum, fossum, jöklum, huldufólki og tröllum. Textarnir eru nokkrar gamlar þjóðvísur og ljóð eftir mörg ástsælustu skáld Íslands. Lögin eru einnig eftir íslensk tónskáld, bæði frá fyrri tíð og núlifandi. Þau eru þannig valin að karakter hvers fyrirbæris kemur sterkt fram í tónlistinni, sem auk þess ber íslensk einkenni. Til að auka áhrif tónlistarinnar verður ljósmynd varpað á vegg bak við flytjendurna með hverju lagi. Ljósmyndarinn Michaël Pankar hefur tekið myndirnar á ferðalögum sínum um Ísland og undirstrika þær dramatískar andstæður íslenskrar náttúru.

Rannveig Káradóttir hefur bæði lagt stund á þverflautunám, jazz söngnám og klassískt söngnám en í því lauk hún burtfararprófi frá Tónlistarskólanum í Reykjavík vorið 2008 undir handleiðslu Alinu Dubik. Síðan hefur hún verið í einkatímum í söng, bæði hér heima og erlendis, og tekið þátt í námskeiðum. Hún hlaut 1. verðlaun í The Barry Alexander International Vocal Competition og kom í tengslum við það fram í Carnegie Hall í New York. Rannveig söng hlutverk Anninu í La traviata eftir Verdi hjá Íslensku Óperunni árið 2008.

Birna Hallgrímsdóttir stundaði píanónám frá unga aldri, bæði við Tónlistarskóla íslenska Suzuki sambandsins, Tónlistarskóla Kópavogs og Listaháskóla Íslands en þaðan lauk hún B.mus. gráðu í píanóleik vorið 2006 undir handleiðslu Peters Maté og Halldórs Haraldssonar. Síðan hefur hún stundað framhaldsnám erlendis, tekið þátt í fjölmörgum námskeiðum og komið fram á mörgum tónleikum á Íslandi og víðs vegar í Evrópu.

Að tónleikum loknum verða kaffiveitingar. Miðaverð er kr. 2.000 og miðapantanir í síma 4875512 og 8645870.

Föstudaginn 1. júlí næstkomandi verður tangóhátíð í Selinu á Stokkalæk. Þar koma fram tónlistarhópurinn Fimm í tangó og dansararnir Hannes Þór Egilsson og Guðmundur Elías Knudsen. Tangóballið í hlöðunni hefst kl. 21 og er miðaverð í reiðufé 2.000 krónur. Veitingar verða fram reiddar í kaffihúsastemmningu í hlöðunni þar sem fólk getur sjálft dansað eða setið og notið þess að hlusta og horfa á dans.

Í Fimm í tangó eru þau Ágúst Ólafsson bassasöngvari, Ástríður Alda Sigurðardóttir píanóleikari, Íris Dögg Gísladóttir fiðluleikari, Kristín Lárusdóttir sellóleikari og Vadim Federov harmóníkuleikari. Þessi hópur kom fyrst saman árið 2007 að frumkvæði Kristínar Lárusdóttur. Kristín hafði kynnst finnskri tangóhefð á námsárum sínum í Finnlandi og markmiðið með stofnun hópsins var að kynna hana fyrir Íslendingum. Upphaflega spilaði hópurinn eingöngu finnskan tangó en ákvað fljótlega að leita eftir samstarfi við tónskáld í þeim tilgangi að fá sérsamin íslensk tangóverk til flutnings. Á undanförnum árum hefur hópurinn haldið fjölda tónleika og frumflutt mörg ný íslensk tangóverk. Nýlega kom út geisladiskurinn Fimm í Tangó og verða lögin af honum m.a. flutt á tónleikunum í Selinu á Stokkalæk

Hannes Þór Egilsson hefur dansað klassískan dans frá blautu barnsbeini og útskrifaðist frá Listdansskóla Íslands. Hann sneri sér að nútímadansi og lauk BA (honor degree) frá London Contemporary Dance School árið 2007. Síðan hefur Hannes verið fastráðinn dansari hjá Íslenska dansflokknum.

Guðmundur Elías Knudsen lauk námi við Listdansskóla Íslands en útskrifaðist síðar frá Hogeschool voor de Kunsten í Arnhem í Hollandi. Hann hefur verið fastráðinn dansari hjá Íslenska dansflokknum í áratug. Guðmundur er einnig meðlimur í spunagrínhópnum „Follow the fun.”

Í tengslum við tangóhátíðina í Selinu á Stokkalæk verður byrjendanámskeið í tangódansi í safnaðarheimilinu á Hellu daginn áður, fimmtudaginn 30. júní frá kl. 20 til kl. 21.30. Kennarar verða þau Bergsteinn B. Björnsson og Tania Strahan og er þátttökugjald kr. 1.000. Fólk þarf ekki að hafa með sér dansfélaga frekar en það vill.

Fimmtudaginn 23. júní hefst í Selinu á Stokkalæk meistaranámskeið í fiðluleik undir handleiðslu Lilju Hjaltadóttur fiðluleikara. Nemendur verða úr Allegro Suzuki tónlistarskólanum og Tónlistarskólanum í Reykjavík. Námskeiðinu lýkur á nemendatónleikum sunnudaginn 26. júní kl. 16 og er aðgangur ókeypis og öllum heimill. Lilja Hjaltadóttir hefur áður staðið fyrir meistarnámskeiðum í Selinu á Stokkalæk sem lokið hefur með tónleikum sem verið hafa vel sóttir og góður rómur gerður að. Hér er einstakt tækifæri fyrir áhugasama foreldra til að koma með börn sín á tónleika.

Þriðjudaginn 28. júní halda þau Kitty Kovács píanóleikari og Balázs Stankowsky fiðluleikari tónleika í Selinu á Stokkalæk. Þau eru ungversk og vel menntuð í tónlist frá heimalandi sínu en fluttu til Íslands árið 2006. Þau hafa starfað sem tónlistarkennarar á Hvolsvelli, Vík í Mýrdal og Garðabæ haldið saman allmarga tónleika bæði hér á landi og erlendis. Á efnisskránni verða verk eftir Bach, Brahms, Rachmaninov og Elgar.

Á báðum tónleikunum verða veitingar og eru miðapantanir í síma 8645870 og 4875512.

Zumba á miðvikudögum í apríl og maí! 

Hress og skemmtileg dansleikfimi!

Kl: 18:00  á miðvikudögum í íþróttahúsinu á Hellu

Hefst 13. apríl.  Verð 6.000 kr.

Sopranos í Selinu á Stokkalæk

Sunnudaginn 10. apríl kl. 16 mun tríóið Sopranos halda tónleika í Selinu á Stokkalæk. Tríóið skipa söngkonurnar Hörn Hrafnsdóttir, Margrét Grétarsdóttir og Svana Berglind Karlsdóttir. Þær stöllur eru þekktar fyrir léttleika, glaðværð og leikræn tilþrif og munu reita af sér fjaðrir og fima tónstiga á tónleikunum. Á efnisskránni er skemmtileg blanda af revíu- og söngleikjaperlum og að auki óperettuáríur í léttum dúr. Á tónleikunum verða veitingar og miðapantanir eru í símum 4875512 og 8645870.  

Skemmtileg dans-leikfimi fyrir alla!

Tveir fríir tímar í boði áður en fjörið hefst fyrir alvöru.

Fyrri tíminn fimmtud. 13. janúar á Laugalandi kl:19.
Seinni tíminn mánud. 17. janúar í Þykkvabæ kl:18.

Nánari upplýsingar eru hjá Sigurbjörgu s:8656519
sigurbjorgulfs@gmail.com

Allir að mæta og prófa!

Fimmtudaginn 2. desember næstkomandi kl. 20 halda þeir Garðar Cortes tenórsöngvari og sænski píanóleikarinn Robert Sund tónleika í Selinu á Stokkalæk. Þeir hafa starfað reglulega saman og lagt áherslu á flutning á þekktum og vinsælum dægurlagaperlum. Saman hafa þeir gefið út þrjá geisladiska með þekktum sönglögum og negrasálmum. Á tónleikunum flytja þeir kunnar og vinsælar dægurlagaperlur, jólalög, negrasálma og íslensk sönglög.

Föstudaginn 3. desember halda þau Kitty Kovács píanóleikari og Balázs Stankowsky fiðluleikari tónleika í Selinu á Stokkalæk. Þau eru ungversk og vel menntuð í tónlist frá heimalandi sínu en fluttu til Íslands árið 2006. Þau hafa starfað sem tónlistarkennarar á Hvolsvelli, Vík í Mýrdal og Garðabæ haldið saman allmarga tónleika bæði hér á landi og erlendis. Á efnisskránni verða verk eftir Franz Schubert og Ludwig van Beethoven auk konsertfantasíu eftir Igor Frolov um stef úr óperu Gershwins Porgy and Bess.

Á báðum tónleikunum verða veitingar og eru miðapantanir í síma 8645870 og 4875512.

Laugardaginn 30. október kl. 16 munu þær Ingibjörg Guðjónsdóttir sópransöngkona, Herdís Anna Jónsdóttir víóluleikari og Sólveig Anna Jónsdóttir píanóleikari halda tónleika í Selinu á Stokkalæk. Á efnisskránni eru m.a. sönglög eftir Atla Heimi Sveinsson og Tryggva M. Baldvinsson og útsetningar á þjóðlögum eftir Alan Smith, Élégie op. 44 eftir Alexander Glazounow og rómansa og aría úr óperunni Töfraskyttunum eftir Carl Maria von Weber. Aðgangseyrir er kr. 2.000 og verða veitingar á tónleikunum. Miðapantanir eru í síma 4875512 og 8645870.

Kennt er í safnaðarheimilinu á Hellu.

Fyrir börn kostar námskeiðið 3.500 kr. en aðra 8.000 kr.  Innifalið er skrifaður diskur með magadanstónlist frá mér.

Mæting er í léttum og þægilegum fötum á tásunum :o)

Menningarráð Suðurlands auglýsir eftir umsóknum um styrki

Einstaklingar, félagasamtök, fyrirtæki, stofnanir og sveitarfélög á Suðurlandi geta sótt um styrki en skilyrði er að umsækjendur sýni fram á mótframlag. Heimilt er að sækja um styrk til verkefna sem umsækjandi er þegar byrjaður að vinna í.

Engar sérstakar áherslur verða settar á þessu ári, en tekið verður mið af eftirfarandi við afgreiðslu umsókna (sbr. 5. grein menningarsamnings fyrir árið 2010):

1.      Efla samstarf á sviði menningarmála.

2.      Efla nýsköpun í verkefnum tengdum menningu.

3.      Atvinnutækifærum fjölgi á menningarsviðinu.

4.      Styðja við menningartengda ferðaþjónustu.

Menningarráðið mun hvorki veita rekstrar-, stofnkostnaðar- né endurbótastyrki. Ekki verður heldur styrkt skráning á menningarminjum, starfsemi íþróttafélaga, bæjarhátíðir, almennar samkomur, safnaðarstarf og hefðbundið menningarstarf innan skóla.

Hótel Örk býður félögum eldri borgara Húsavík, Þingeyjarsveit, Mývatnssveit, Öxarfjarðarhéraði, Þistilfirði, Vopnafjarðar- og Bakkafirði, og Sunnlendingum

aðgang að sparidagaviku dagana 15. – 20. febrúar 2009

Um er að ræða fimm sólarhringa dvöl á hótelinu og er boðið upp á dagskrá alla daga

frá morgni til miðnættis. Dagskrárstjórn verður á hendi hins reynda stjórnanda,

Gunnars Þorlákssonar.

Upplýsingar um félagsmiðstöðina Hellirinn.

Haustið 2008 breyttu unglingarnir nafni félagsmiðstöðvarinnar! Í dag heitir hún “Félagsmiðstöðin Hellirinn”.

Helstu verkefni Hellirsins eru Samféshátíðin sem er söngvakeppni og dansleikur. Einnig er undankeppni alltaf á haustin sem er á Suðurlandi. En félagsmiðstöðin er fyrst og fremst athvarf fyrir börnin og unglinganna til að hittast á og njóta samveru í leik og gleði.

Opnunartími félagsmiðstöðvarinnar er sem hér segir:

4 – 7 bekkur, þriðjudaga  frá kl.16:00 – 18:00

8 – 10 bekkur, þriðjudaga og fimmtudaga frá kl.19:30 – 22:00

Stefnt er einnig að því að 1 - 3. bekkur fái tækifæri til að kynnast félagsmiðstöðinni og fái aðgang að henni 1-2 á önn.

Áætlað er að hafa tölvunámskeið með líku sniði og var á síðasta ári ef þátttaka fæst, þeir sem hafa áhuga vinsamlega hafið samband við Eggert í síma 487 5019 fyrir 6. apríl.

Þeir sem ætla að fara í 2 sæludaga til Vestmannaeyja 17-19 apríl verða að panta í síðasta lagi 6. apríl hjá Þórunni í síma 487 5922, enn eru laus pláss.  Sjá kynningu hér neðar á síðunni í fréttabréfinu!   
Stjórnin.

Nú er komið nýtt ár og allir fastir liðir komnir í réttan farveg, föndur, útskurður og kór.

Þó veðráttan hafi leikið okkur svolítið grátt núna undanfarið verður það vonandi bara um tíma.

Fréttir frá Hring kór eldri borgara.

Æfingar eru á mánudögum kl: 2-4 í Sögusetrinu á Hvolsvelli og verður það í vetur. Á síðasta ári söng kórinn fyrir aðra 14 sinnum og virðist ætla að halda áfram á þessu ári. Fyrirhugað er að kór eldri borgara í Reykjavík komi í heimsókn 5. apríl og Hringur fari í heimsókn til Gaflara í Hafnarfirði 14. maí.  Það má geta þess að fjölgun hefur orðið í kórnum á þessu nýja starfsári og alltaf má bæta við fólki.

Þar fór fram stjórnarkosning og var stjórnin öll endurkjörin:

Formaður; Eggert Ólafsson,
varaformaður; Guðrún Jónsdóttir,
ritari; Erla Emilsdóttir,
gjaldkeri; Þórunn Ragnarsdóttir,
meðstjórnandi; Sigrún Jónsdóttir.
Varamenn í stjórn; Auður Einarsdóttir og Trausti Runólfsson.