Menning og Mannlíf

• Bókasöfn
• Töðugjöld
• Fréttir
• Tilkynningar
• Veðurklúbburinn
• Vefir
• Eldri borgarar
• Annað

8.2.2010 14:28

Dagur Leikskólans

Sjötti febrúar er „Dagur leikskólans“, en þann dag árið 1950 stofnuðu frumkvöðlar leikskólakennara fyrstu samtök sín og því er félagið nú 60 ára. Þetta er þriðja árið í röð sem leikskólar halda daginn hátíðlegan. Daginn bar að þessu sinni upp á laugardag og því fögnuðum við honum síðastliðinn föstudag 5. febrúar með því að halda náttfataball fyrir börnin og mála þau í framan.

Einnig gerðum við veggspjöld til kynningar á leikskólanum og settum á fjölfarna staði í samfélaginu svo almenningur geti fræðst örlítið um starf leikskólans á Laugalandi. Dagur leikskólans er samstarfsverkefni Félags leikskólakennara, mennta-og menningar málaráðuneytis, Sambands íslenskra sveitarfélaga og Heimilis og skóla. Tilgangurinn er að auka jákvæða umræðu um leikskólann, vekja umræðu um hlutverk leikskóla, starf leikskólakennara og kynna starfið út á við. Í tilefni dagsins komu um 30 leikskólakennarar víðsvegar af Suðurlandi (deild 8) til okkar í leikskólann á Laugalandi. Það var glatt á hjalla, mikið spjallað, drukkið morgunkaffi og leikskólinn skoðaður. Síðan var haldinn lítill fundur þar sem m.a. var rætt um þær breytingar sem verða á félaginu í vor þegar skólastjórnendur leikskóla færast yfir í nýtt félag.