Menning og Mannlíf

• Bókasöfn
• Töðugjöld
• Fréttir
• Tilkynningar
• Veðurklúbburinn
• Vefir
• Eldri borgarar
• Annað

24.11.2009 08:29

Veðurklúbburinn Lundi

Hekla alhvít, það gæti kólnað

Fundur haldinn í Veðurklúbbnum Lundi 11. nóvember 2009.
Jón Þórðarson setti fund og stjórnaði honum að vanda.Ritari fundar, Margrét Þórðardóttir las fundargerð síðasta fundar. Þá bauð Jón fundarstjóri velkominn gest fundarins Vilborgu Gísladóttur í Fosshólum. Vilborg er dóttir hjónanna Guðmundu Valmundsdóttur og Gísla Kristjánssonar. Vilborg er fædd á Móeiðarhvoli en ólst upp á Vindási á Landi, en þar bjuggu foreldrar hennar allan sinn búskap. Systkinin á Vindási eru sex, þar var oft glatt á hjalla, mikið sungið og kveðist á. Skólagangan hófst á Hellum á Landi, svo á Laugalandi og síðan í Skógaskóla. Vilborg giftist Þórði Matthíasi Sigurjónssyni í Fosshólum og eiga þau þrjú börn og þrjú barnabörn. Þau hjón ráku blandaðan búskap í 40 ár, þar til Matti lést árið 2006. Vilborg vinnur við Leikskólann á Laugalandi. Hún lærði leikskólafræði í Kennaraháskólanum og útskrifaðist vorið 2007. Vilborg er sveitakona í húð og hár. Áhugamálin eru fjölskyldan, ferðalög og söngur, svo eitthvað sé nefnt. Hún syngur í Samkór Rangæinga og Kirkjukór Marteinstungu- og Hagakirkna. Vilborg las ljóðið ,,Átthagaóður” eftir Guðmund Daníelsson og ,,Veðurvísur” Jónasar Hallgrímssonar.

Fundarstjóri minntist Sigurðar Jónssonar frá Kastalabrekku sem er nýlátinn, en Sigurður og Steinunn kona hans voru gestir Veðurfundar snemma í vor. Fundurinn sendir Guðmundi Karli ritstjóra Sunnlenska fréttablaðsins baráttukveðjur í veikindum hans.

Veðurspáin:

Guðrún Valmundsóttir telur veður verða gott áfram, Hjalti og Kristjón taka undir það. Sama segir Bjarnhéðinn en telur að 1. des. gæti komið bylur. Bragi segir að það gæti kólnað vegna þess að Hekla er alhvít. Guðni telur að gott verði áfram með austanátt, hætt við breytingum upp úr imbru nær jólum. Sveinbjörn Benediktsson telur svipað veður fram til Þorláksmessu en heldur kólnar upp úr mánaðarmótum. Edda heldur sig við fyrri spá, það kólni milli jóla og nýárs, því verður mikið myrkur nú í skammdeginu. Vilborg telur vetur verða mildan og undir það tekur Jón Þórðarson.

Fréttst hefur að fólk sem spáir í kindagarnir telji vetur verða mildan en líkindi á páskaherti. Rætt er um hverju sæti að fáa dreymi nú fyrir veðri. Helst er hallast að því að það stafi af litlum veðurbreytingum. Guðni kastar fram vísu:

Veðurdrauma væntum senn

alltaf um þá ræðum.

Ætli allt sé óklárt enn

á efri veðurhæðum.

Fundi sem 17 manns sóttu var slitið kl. 17.10.

Næsti fundur verður 25. nóvember kl. 16:00.