Menning og Mannlíf

• Bókasöfn
• Töðugjöld
• Fréttir
• Tilkynningar
• Veðurklúbburinn
• Vefir
• Eldri borgarar
• Annað

4.11.2009 11:49

Veðurklúbburinn Lundi

Mildur vetur, en líklega hvít jól

Fundur haldinn í Veðurklúbbnum á Lundi 28. október. Jón Þórðarson stjórnaði fundi sem settur var kl. 16.10.

Ritari fundar Margrét Þórðard. las síðustu fundargerð, að svo búnu bauð Jón gest fundarins Sigríði Helgu Heiðmundsdóttur velkomna. Sigríður er dóttir hjónanna Klöru Haraldsdóttur og Heiðmundar Klemenssonar sem bjuggu á Kaldbak á Rangárvöllum. Sigríður hefur mestmegnis alið sinn aldur á heimaslóð utan einn vetur sem hún var á Patreksfirði og vann þar í fiski. Sigríður hefur verið bóndi á Kaldbak síðan 1984. Maður hennar er Viðar Steinarsson og eiga þau tvær dætur Klöru sem var gestur okkar á síðasta fundi og Ösp sem er sagnfræðingur. Auk hefðbundins búskapar hafa hjónin á Kaldbak stundað skógrækt frá árinu 1990 undir merkjum Suðurlandsskóga. Sigríður er formaður Skógræktarfélags Rangæinga, en það var stofnað 1943. Stærsta ræktunarsvæði þess er í Bolholti á Rangárvöllum en þar hófst plöntun 1989. Þar hafa nú verið seld jólatré í sex ár, en sífelt vinsælla er að fjölskyldur komi í skóginn að velja og höggva sér jólatré. Á vegum Skógræktarfélagsins voru á síðasta sumri gróðursettar 200.000 plöntur. Félagið vinnur einnig að landvernd og uppgræðslu.

Veðurspáin:

Halldóra og Auður spá góðu áfram og Kristjón tekur undir það. Sigrún Haraldsdóttir spáir snjóléttum vetri. Hjalti hefur ekki fengið neina vitrun enn. Jón Helgason segir að blíða verði áfram þar til breytist. Brynjólfur segir að tíð verði góð út nóvember. Davíð telur blíðu verða til áramóta, líklega í allan vetur. Guðni segir góða tíð verða fram að næsta fundi. Spánni fylgir vísa:

Áfram mun ríkja austanátt.

Áttin eftir tungli fór.

Vetrartíðin mun breytast brátt.

Bara lítið, en enginn snjór.

Edda segir sömu blíðu verða þar til milli jóla og nýárs nema kannski dag og dag. Jakobína segir veturinn verða góðan en líklega hvít jól og aðeins snjó á jólaföstu. Ingibjörg sagnfræðingur tekur undir það. Sigríði Heiðmundsdóttur hefur ekkert dreymt fyrir vetrinum, en telur að gæti verið kæla framundan. Hún lætur okkur vita þegar hana dreymir eitthvað.

Áfram spjallað um veturinn, en fyrsti vetrardagur var síðasta laugardag. Halldóra Ólafsdóttir rifjar upp gamlan húsgang því tengdan:

Gormánuður grettið tetur,

gengur í hlað og leiðir vetur.

Fundi sem nær tuttugu manns sóttu var slitið kl. 16.55. Næsti fundur verður 11.nóvember.