Menning og Mannlíf

• Fréttir
• Tilkynningar
• Veðurklúbburinn
• Vefir
• Eldri borgarar
• Annað

4.6.2009 11:19

Veðurklúbburinn Lundi.

Horfur á ágætu sumri

Fundur í Veðurklúbbi Lundar 27. maí. Jón Þórðarson setti fund kl. 16.10.

Margrét Bjarnadóttir fráfarandi ritari las fundargerð síðasta fundar, voru henni þökkuð ritarastörfin og nýr ritari, Margrét Þórðardóttir boðin velkomin.

Jóna María var uppalin á Reykjalundi í Mosfellssveit, foreldrar hennar voru þar sjúklingar. Á Reykjalundi var notalegt samfélag nánast sem ein fjölskylda, samvera á jólum eftirminnileg. Seinna fluttist Jóna María til Vestmanneyja, þar sem hún kynnist Reyni, manni sínum. Þau bjuggu í Eyjum í fjögur ár, - og þar var lífið nú gott, meðal annars að safna pysjum og sleppa á sjóinn. Núna er Jóna María starfsmannastjóri Landgræðslunnar.

Reynir er fæddur og uppalinn á Heiði á Rangárvöllum. Hann hóf skólagöngu í heimavistarskóla á Strönd og minnist ánægjustunda þar. Reynir var fimm vertíðir í Eyjum. Áhugamál beggja hjónanna er tengt búskap og ræktun og þeim hentar betur að búa í sveit. Reynir vann fyrst við búskap Landgræðslunnar en störf breyttust og áherslur í landgræðslu með hlýnandi veðurfari. Stærstu verkefni nú eru meðal annars uppgræðsla á Landeyjasandi fyrir Siglingamálastofnun og við Kárahnjúka fyrir Landsvirkjun. “Bændur græða landið” er einnig viðamikið verkefni.

Reynir stundar einnig tófuveiðar, tók við því af Sigurði Ásgeirssyni.

Jóna María sagði forréttindi að hafa kynnst gömlum mönnum er störfuðu og bjuggu í Gunnarsholti og ómetanlegt að læra af þeim lífsspekina. Hún hefur haldið veðurdagbók í nær 15 ár. Telur ekki miklar breytingar milli ára annað en hlýnandi veður.

Eftir kaffihlé var var komið að veðurspánni.

Ingibjörg Ólafsdóttir kom með heimildir um Imbrudaga teknar saman af Kristjáni Val Ingólfssyni. Segir þar meðal annars: “Imbrudagar byggja á æfafornri venju kristninnar í vesturálfu. Þeir eru eins konar inngangur að árstíðunum fjórum. Ekki er ólíklegt að þeir hafi upphaflega verið tengdir hátíðum í heiðnum sið rétt eins og jólin.

Nafnið er komið úr engilsaxnesku og er merking þess umdeild.”

Jón fundarstjóri leitaði eftir veðurspá sumarsins. Hann segir marga spyrja “hvernig spáir Veðurklúbburinn fyrir komandi sumri?”. Ragnhildur segir ekki hægt að spá öðru en góðu í þessari einmuna blíðu. Magga Bjarna segir fara að rigna um mánaðamót júní – júlí . Magnús Kjartansson telur að erfitt verði með heyþurrk. Billi frá Lækjarbotnum segir að eftir hvítasunnu komi blautur júní en þorni með hundadögum. Reynir spáir vætusömu til 20. júní, heyskapartíð verði góð og ágúst bestur. Bjarnhéðinn segir gott framundan.

Guðni vitnar í fyrri spár - sumarið verði gott í heild en skúrir af og til. Edda tók undir það; gott veður en köflótt.

Guðni lumaði á einni vísu í restina.

Vorveðrið er eins og vænta mátti,

víða svífa frjó.

Á uppstigningardag ég átti

enga von á snjó.

Fundi slitið kl.17.20. Fundinn sátu tuttugu manns. M.Þ.