Menning og Mannlíf

• Bókasöfn
• Töðugjöld
• Fréttir
• Tilkynningar
• Veðurklúbburinn
• Vefir
• Eldri borgarar
• Annað

22.1.2009 09:33

Veðurklúbburinn Lundi

“Úlfakreppa”

Þann 21.jan hélt Veðurklúbbur Lundar sinn annan fund á árinu.
Fundarritari las fundargerð síðasta fundar og Jón Þórðar bauð fundargesti velkomna.
Gestur okkar í dag var Indriði Indriðason fjármálastjóri hjá Rangárþingi Ytra.
Indriði er borinn og barnfæddur Kópavogsbúi. Meðan hann var að feta sig áfram í lífinu vann hann hin ýmsu störf eins og gerist um unga menn eins og að vinna í fiski, fór á sjóinn, síðan fór hann í Iðnskólann og lærði bakaraiðn og vann við það um árabil. Fór þá í Háskólann í viðskiptafræði, lauk síðan master í fjármálum og hagfræði.

Eftir kaffihlé var snúið sér að hinu einu sönnu Lundarspá.

Jagga spáir góðum vetri eins og síðast, Guðni segir svipað áfram kólni þegar líður að Þorra síðan snjógumsi í febrúar eins og hann komst að orði, Kristján frá Árgilsstöðum spáði að Þorri harðni þegar líður á hann, síðan vægari efti það, Ásgeir segir að febrúar verði með umhleypingum en 1934 sást “úlfakreppa” sem eru þrír geislar sem mynda þríhyrning utan um sólina, þá urðu umhleypingar það árið.Hjalti spáði langt fram í febrúar svipuðu veðri, Jón segir að svipað veður verði áfram og kólnar ekki á næstunni, Billi sagði að breytir í Þorranum en Davíð ekki fyrr eftir Þorra, Indriði gesturinn okar spáði slagveðri út Þorra síðan snjó fram undir páska svo vori snemma.

Talið barst að Evrópusambandinu, hvort við ættum að ganga í það eður ei. Jón Þórðar var þá nýkominn frá tannlækni sem ekki vildi Evrópusambandið. Þetta varð Jóni Helga að yrkisefni:

Sjálfstæðismenn með stefnu ljósa
Sýnist Jón í vanda þar
Evrópumálin ei vill kjósa
Ef það kostar tennurnar.

Það var heldur ekki djúpt á vísu frá Guðna
Þó vindar blási og vökni kinn
Í veðurspána rýni að vanda
Það fór svo í þetta sinn
Að snjórinn lét ekki á sér standa.

Indriði fékk fallegar vísur frá tengdapabba síns sem er Helgi Seljan vísurnar frá honum eru svona:
Lengjast dagar, léttast spor
Lóan trúi ég brátt að syngi.
Þá í leiftrum litríkt vor
Leikur sér í Rangárþingi.

Gróðurnál um grundir fer,
Grænka lauf í hlýjum vindi.
Þá í lofti leika sér,
Léttfleyg ský á Heklutindi.

Þegar andar blíður blær,
Blessun nýja vorið færir,
Þá mun ljóma land og sær,
Lífstrú mína endurnærir.

Fundi slitið kl 17.30. 16 manns sátu fundinn. Næsti fundur verður líklega 4.feb.