28.  fundur hreppsnefndar Rangárþings ytra, á kjörtímabilinu 2010 - 2014, verður haldinn að Suðurlandsvegi 1, Hellu, fimmtudaginn 2. febrúar 2012, kl. 15:00.

Álagningarseðlar fasteignagjalda fyrir árið 2012 verða eingöngu birtir rafrænt og ekki sendir út með landpósti eins og venja hefur verið. Frá og með  25. janúar 2012 geta fasteignaeigendur nálgast álagningarseðil sinn á upplýsinga- og þjónustuveitunni Ísland.is (vefslóð er http://www.island.is). Auðkenning á Ísland.is er með veflykli ríkisskattstjóra eða rafrænum skilríkjum.  

1. desember 2011 breyttist fyrirkomulag á meðferð heimilissorps og endurnýtanlegs úrgangs í  Rangárvallasýslu.  Sorpstöð Rangárvallasýslu heldur utanum verkefnið fyrir sveitarfélögin í sýslunni  Stærsta breytingin var sú að öll heimili í sýslunni fengu tvær tunnur, aðra fyrir óflokkaðan/óendurvinnanlegan heimilisúrgang og hina fyrir þurrt og hreint efni til endurvinnslu. 

Nú er verið að vinna að uppsettningu á nýju bókhaldskerfi fyrir sveitarfélagið. Nýja kerfið er komið í notkun og mun það breyta vinnslu við bókhaldið töluvert.  Mikið mun draga úr notkun á pappír og mun kerfið bjóða upp á frekari rafrænar afgreiðslur á málum.
Starfsfólk skrifstofu mun þurfa að sækja námskeið á nýja kerfið og verður því skrifstofan lokuð á miðvikudag og fimmtudag, þann 11-12 janúar. Beðist er velvirðingar á þeim óþægindum kunna vera sökum þessa.
 
Tekið verður við tölvupóstum og verða þeir afgreiddir eins og áður.

Skrifstofa Rangárþings ytra. 

Einstaklingar, félagasamtök, fyrirtæki, stofnanir og sveitarfélög á Suðurlandi geta sótt um styrki en skilyrði er að umsækjendur sýni fram á mótframlag. Heimilt er að sækja um styrk til verkefna sem umsækjandi er þegar byrjaður að vinna í.

Í greinargerð, sem send var sveitarstjórnum 29. nóvember sl. var greint frá fyrirhuguðum aðgerðum til að mæta kröfum um útgjaldalækkun Heilbrigðisstofnunar Suðurlands vegna fjárlaga fyrir árið 2012.

Velferðarráðuneytið hefur nú staðfest, að ákveðin leiðrétting verði gerð á fjárveitingu til stofnunarinnar, umfram það sem kemur fram í nýsamþykktum fjárlögum fyrir árið 2012.  Það veldur því, að hægt verður að draga úr þeirri útgjaldalækkun, sem frumvarp til fjárlaga gerði kröfu til.   M.a.  verður því hægt að falla frá áður fyrirhugaðri lokun heilsugæslustöðvarinnar á Hellu.

Sveitarstjórnir Rangárþings ytra og Ásahrepps mótmæla harðlega yfirlýsingu Heilbrigðisstofnunar Suðurlands (HSU) um að loka eigi Heilsugæslustöðinni á Hellu. Heilsugæslustöðin á Hellu þjónar íbúum á stóru svæði í Rangárvallasýslu, hátt í 2.000 íbúum, hátt í 500 húsa sumarbústaðabyggð auk gríðarlegs fjölda ferðamanna. Að auki er Stjórnstöð Almannavarna og fjöldahjálparstöð staðsett á Hellu.

Þegar þú setur niðursuðudósina, álpappírinn, og brotnu teskeiðina í ruslatunnuna ertu í raun að skila þessum málmum til endurvinnslu.  Í vetur var settur upp vélbúnaður í móttökustöð SORPU í Gufunesi sem flokkar með sjálfvirkum hætti málma frá almennu heimilissorpi. Með þessu móti er ekki þörf á sérstakri flokkunaraðstöðu á heimilum fyrir smáa málmhluti og minna þarf að fara með á gámavöllinn. Málmar eru um 3 % af heimilissorpi á hverjum tíma og því mjög jákvætt að ná þessum verðmætum úr sorpinu með lítilli fyrirhöfn og kostnaði. SORPA flokkar málmana enn frekar í framhaldinu,  þannig  er  t.d.  járn , ál  og  kopar aðgreint  sem tryggir betra verð fyrir vikið. Flestir málmarir eru endurunnir í málmbræðslum á Bretlandi og Spáni.  Eftir bræðslu eru málmarnir markaðsvara og notkunarmöguleikar óendanlegir, kannski gítarstrengur eða frambretti á bíl.

Aðventuhátíð kl:13:00-16:00 sunnudaginn 27.nóvember að Laugalandi Holtum.

Handverksmarkaður, tombóla, tónlistaratriði, kynning á bókum og geisladiskum, veitingasala og kökubasar.

Sýning á handunnum teppum.

Dagskrá:

kl: 13:00  Hátíðin sett

kl: 13.15  Flautuleikur, Kvartett Rangænga

Kl:13:30  Kveikt á fyrsta aðventuljósinu

Kl:14:00  Tónlistarval Laugalandsskóla, undir stjórn Eyrúnar Jónasdóttur

Kl:14:20  Jólasveinar koma í heimsókn

Kl:14:30  Kveikkt á jólatrénu og hugvekja, sr. Halldóra Þorvarðardóttir

 Tombólan vinsæla er á sínum stað og handverksmarkaður með fjölbreyttu handverki.

Tilkynning frá Þjóðskrá.  Vakin er athygli á að tilkynningar um breytingar á lögheimili þurfa að berast eigi síðar en miðvikudaginn 7. desember svo unnt sé að tryggja að einstaklingar séu rétt skráðir í íbúaskrá miðað við 1. desember þessa árs.

Kynningarfundir á vegum Ásahrepps, Rangárþings eystra , Rangárþings ytra og Sorpstöðvar Rangárvallasýslu bs. um breytta tilhögun sorphirðu og sorpflokkun í Rangárvallasýslu, sem taka á gildi 1. desember n.k. verða haldnir sem hér segir:

22. nóvember 2011 kl. 14:00 á Heimalandi

22. nóvember  2011 kl. 20:30 í Félagsheimilinu Hvoli

24. nóvember 2011  kl. 14:00 á Laugalandi

24. nóvember 2011  kl. 20:30 í Grunnskólanum á Hellu.

Bætt umhverfi - betri framtíð í Rangárþingi

Nú standa yfir breytingar í úrgangsmálum í Rangárþingi í kjölfars útboðs á sorphirðu.  Þann 24. október sl. undirrituðu fulltrúar Sorpstöðvar Rangárvallasýslu þjónustusamning við forsvarsmenn Gámakó ehf. (dótturfyrirtæki Gámaþjónustunnar hf.) vegna sorphirðu í Rangárvallasýslu. 

Í samstarfi við Gámakó hafa sveitarfélögin sem standa að Sorpstöð Rangárvallasýslu ákveðið að stórauka endurvinnslu og endurnýtingu með því að leggja til svokallaða Blátunnu (Endurvinnslutunnu) fyrir hvert heimili í sveitarfélögunum.  Einnig munu sveitarfélögin leggja til tunnu fyrir annan heimilisúrgang fyrir þau heimili sem ekki eru með slíka tunnu fyrir.

Starfsmenn sveitarfélaganna munu dreifa þessum tunnum nú í nóvember og eru íbúar hvattir til að finna góða staðsetningu með það í huga að auðvelda aðkomu að sumri sem vetri. Miðað er við að fjarlægð íláta við íbúðarhús sé ekki meira en 20 metrar frá söfnunarbíl.  Mjög mikilvægt er að tunnur séu vel varðar fyrir veðri en jafnframt er mikilvægt að þessar varnir séu ekki hindrun fyrir þá sem sorphirðunni sinna.

Nýtt sorphirðukerfi með hinum nýja þjónustuaðila mun byrja 1. desember nk.

Safnahelgin verður haldin í fjórða skipti 4.-6. nóvember.

Söfn, setur, veitingastaðir, kaffihús, listamenn, handverksfólk, sýningarsvæði og allir sem hafa áhuga geta verið með.

Skrá þarf þátttöku þar sem eftirfarandi kemur fram:

Hvar viðburðurinn verður:

Hvenær:

Heiti:

Lýsing (1-2 setningar):

Tengiliður, nafn, síma, netfang, heimasiða

1. hæð miðrýmis við Suðurlandsveg 1-3 á Hellu var tekin í notkun föstudaginn 16. september síðastliðinn.  Bakaríið Kökuval hefur nú flutt starfsemi sína í þetta nýja og glæsilega húsnæði en einnig er aðalinngangur að heilsugæslunni og matvöruverslun Kjarvals í gegnum miðrýmið. 

Iðnaðarmenn eru að leggja lokahönd á frágang jarðhæðar hússins þessa dagana og stefnt er að 2. hæð miðrýmisins verði tilbúin til leigu í október.  Áætlað er að ný fólkslyfta hússins verði tilbúin til notkunar í desember en með tilkomu hennar verður aðgengi fatlaðra að verslun og þjónustu við Suðurlandsveg 1-3 stórbætt.  Húsið verður opnað formlega þegar þessum framkvæmdahlutum er lokið.

Bæjarhátíðin Töðugjöld verður haldin í Rangárþingi ytra helgina 12.- 14. ágúst. Hátíðin er haldin af íbúunum sjálfum fyrir íbúa og velunnara.  Fjölbreytt dagskrá er í boði fyrir börn og fullorðna og verður góða skapið við stjórnvölinn.

Málefni Suðurlandsvegar 1-3 ehf. hafa ratað inn á héraðsfréttamiðla síðustu vikur.  Það sem fréttnæmt þykir er að stjórn félagsins hafði tekið ákvörðun um að bæta aðgengi að byggingunni  og vegna þess þurfti hlaðinn veggur á lóð framan við húsið að víkja.

Umhverfisverðlaun Rangárþings ytra voru afhent í Árhúsum á Hellu í síðustu viku.  Verðlaunin voru veitt fyrir snyrtilegustu lóðir og garða í sveitarfélaginu og voru staðirnir opnir almenningi um síðustu helgi. Verðlaunað var fyrir fjóra flokka;

Í sveitum landsins er fjöldinn allur af eyðibýlum og öðrum yfirgefnum íbúðarhúsum sem mörg hver eru vel byggð og geyma merka sögu. Ástand þeirra er mjög misjafnt en mörg þeirra er þó enn hægt að gera upp og nýta. Sett hefur verið af stað verkefni sem felur í sér rannsókn á menningarlegu vægi þessara húsa, björgun þeirra, endurgerð og nýtingu. Fyrstu skref verkefnisins eru tekin í sumar. Þau fela í sér að hefja rannsókn á fjölda, ástandi og eignarhaldi þessara gömlu húsa á Suður- og Suðausturlandi. Aðstandendur verkefnisins eru Gláma– Kím arkitektastofa, R3- Ráðgjöf og Ómar Bjarki Smárason jarðfræðingur. Verkefnisstjórar eru Gísli Sverrir Árnason og Sigbjörn Kjartansson.

Sveitarfélögin Rangárþing ytra og Ásahreppur og Oddasókn undirrituðu, við setningu landsmóts harmonikuunnenda á Hellu fimmtudaginn 30. júní, samning til eflingar menningarstarfs og félagsstarfs eldri borgara.

Landsmót harmonikufélaga verður haldið á Hellu dagana 30. júní til 3. júlí næstkomandi í boði Harmonikufélags Rangæinga, sannkölluð fjölskylduhátíð.  Íþróttahúsið á Hellu verður vettvangur mótsins.

Í morgun 15. júní, lagði vaskur hópur vinnuskólafólks upp í ferð frá Þjónustumiðstöð Rangárþings ytra og er ferðinni heitið að Kirkjubæjarklaustri og nágrenni til að aðstoða fólk og fyrirtæki á öskufallsvæðunum við að þrífa fyrir þjóðhátíðardaginn 17. júní.

Hugmyndin að verkefninu er komin frá krökkunum sjálfum og sýnir ótvírætt að hugarfarið hjá unga fólkinu okkar er í góðu lagi.

Það er kunnara en frá þarf að segja að mikil óvissa hefur verið um framtíð tengibyggingar á milli Suðurlandsvegar 1 og 3 á Hellu. En nú er farið að rofa til og er undirbúningur við framkvæmdir kominn af stað. Selhús ehf., sem eru aðalverktakar, eru byrjaðir á undirbúningi fyrir lokaáfanga og stefnt er að því að ljúka framkæmdum við lóð og opna fyrstu hæð eins fljótt og auðið er.

Í gær komu hingað á Hellu hlauparar í hlaupahópnum "Á meðan fæturnir bera mig" þar sem hlaupið er til styrktar krabbameinssjúkum börnum. Fyrsti áfangi í hlaupinu var frá Reykjavík til Hellu. Á heimasíðu hlaupsins kemur eftirfarandi fram:

Skólagarðar verða starfræktir á Hellu í sumar fyrir börn í 1. – 7. bekk þar sem þau geta ræktað sitt eigið grænmeti með hjálp foreldra og forráðamanna.

Staðsetning: Norðan við Hjúkrunarheimilið Lund                       Hefst: 6. júní 2011

Kostnaður: 3.000 á garð (systkini geta verið saman með garð)

Innifalið í kostnaði: Um 10m² garður, áburður, 1 kg af útsæði, forræktaðar plöntur af nokkrum tegundum (rófur, hnúðkál, brokkolí o.fl.) ásamt fræi af gulrótum og rauðrófum.

Fyrirkomulag: Plöntur og fræ verða til afhendingar mánudaginn 6. júní kl. 13-18. Þá mæta börnin ásamt foreldrum sínum, fá garð og hjálpast að við að gróðursetja og sá. Mikilvægast er að koma plöntunum strax niður. Fjölskyldur koma með sín eigin verkfæri, en gott er að hafa meðferðis vinnuvettlinga, litla skóflu, hjólbörur og garðkönnu. Mikilvægt er að merkja garðana með skilti og svo má skreyta til að gera garðana fallegri.

Ath. Engin gæsla verður í skólagörðunum.

Skráning fer fram þann 1.-3. júní á skrifstofu Rangárþings ytra s: 488-7000 (Iða Brá).

Sundlaugin á Hellu hefur verið opnuð aftur eftir atburði síðustu daga.  Hreinsunarstörf hafa gengið vel  og vonumst við til að ekki komi til frekari óþæginda vegna öskunnar úr Grímsvatnagosinu.

Allir í sund. :-)

Skólahald hefur verið með skipulögðum hætti í dag í Rangárþingi ytra þrátt fyrir að þykkt öskuský hafi  legið hér yfir í gær og í nótt.  Í dag hefur blásið nokkuð að norðan og öskunnar gætir því ekki eins þó svo hún liggi yfir öllu og fjúki um.

Sundlaugin á Hellu er svört af ösku og ákveðið hefur verið að halda henni lokaðri þar til hægt verður að hreinsa hana og halda henni hreinni.  Náttúruöflin ein ráða þar ferð en allir pottar hafa verið hreinsaðir og verður reynt að hafa þá opna á meðan á þessum ósköpun stendur.  Fólk getur því mætt í íþróttamiðstöðina og skolað af sér öskuna þó svo sundspretturinn verði að bíða um sinn.

KFR stendur fyrir knattspyrnuveislu á Helluvelli n.k. mánudag 9.maí.  Þar verða þjálfarar með knattþrautir og æfingar fyrir alla yngri flokka félagsins frá kl.16:00-18:00.  Að þeim loknum bjóða Kökuval og SS upp á grillaður pylsur fyrir krakkana.

Þegar krakkarnir eru búnir að borða þarf koma sér fyrir í brekkunni við völlinn til þess að horfa á einn stærsta leik hjá meistaraflokki KFR, sem leikinn hefur verið. Þar mætir KFR - HK í annarri umferð Valitor bikarsins. Leikurinn hefst kl. 19:00. HK liðið  leikur í 1.deild en ljóst er að okkar menn gefa ekkert eftir í baráttunni.

Rangæingar, nú er lag að styðja sína menn!

ALLIR Á VÖLLINN!!

Miðvikudaginn 20. apríl næstkomandi klukkan 20:00 er áætlað að áheitasundi starfsmanna Íþróttamiðstöðvarinnar ljúki. Af því tilefni ætlar Ómar Diðriks að mæta á bakkann með gítarinn og spila nokkur lög milli 19:00 og 20:00.

Við hvetjum ykkur til að fjölmenna í laugina og pottana og fylgjast með sundgörpunum taka síðustu metrana.

Við viljum þakka þeim einstaklingum og fyrirtækjum sem hafa þegar styrkt okkur og minnum á að reikningur Kormáks er enn opinn og verður eitthvað áfram :)

Rnr. 0308-26-004702 og Kt. 470211-0400